TORSDAG DEN

23. juni, sjølvaste sankthansaften, 2016 vil bli ståande som ein stor dag for sjølvråderetten. Det britiske folket reiste seg i ei folkerøysting mot»eliten» i EU, mot finanskapitalen, mot byråkratveldet, mot fjernstyringa frå Brussel og for sjølvråderett.

Å VÅKNE DAGEN etter var ein sterk opptur etter den heller «dystre» stoda tidlegare på natta. Då resultatet av folkerøystinga var hundre prosent sikkert, gjekk flagget til topps her heime i Sørreisa. Dette forblir ein historisk dag! EU-kommisjonen, Det Internasjonale Pengefondet (IMF), Den Europeiske Sentralbanken må begynne å ta omsyn til folket.

SOLIDARITET OG samhandling er dynamitt, det er sprengkraft. Det er denne sprengkrafta me treng for å få styresmaktene i Noreg til å arrangere ei folkerøysting for å få sagt opp EØS-avtalen. Noreg har gjennom EØS-avtalen signert ein husmannskontrakt med EU, og nordmenn er gjort til husmenn under EU, ettersom me folket må godta alle reglar og føresegner fråBrussel for å få vera med i den såkalla indre marknaden.

RESULTATET AV folkerøystinga i Storbritannia må vera ein alvorleg tankevekkjar for regjering og storting, som den 15. juni 2016 vedtok å overføre tilsynet med norske bankar, forsikringsselskap og andre finansinstitusjonar til EU. Norske srtyresmakter gjekk dermed motsett veg i høve til Britane, som vil ha meir sjølvråderett medan våre tillitsvalde gir frå oss sjølvråderett.

DETTE SKJEDDE trass i at det var i strid med den norske grunnlova og tydelege protestar frå folkedjupet. På papegøyespråket til Jonas Gahr Støre, Erna Solberg, Trine Skei Grande og NHO etterapar dei kvarandre med påstanden om at EØS-avtalen er ei lukke for den norske handelen med EU. Dette er og blir løgn! Dei nemnde politikarane, (tillitsvalde folkeforførarar) underslår verdien av den handelsavtalen Noreg hadde med EU på det tidspunktet EØS-avtalen vart underteikna.

DETTE KJENNER og tidlegare statsminister og folkeforførar Gro Harlem Brundtland svært godt til. Ho var då godt assistert av Jonas Gahr Støre. Resultatet av folkerøystinga i Storbritannia har tent ein gnist i alle dei kreftene i Europa (Noreg er så avgjort ein del av Europa og har alltid vore det) som arbeider for demokrati, gjensidig respekt på tvers av landegrensane og for fred.

I DENNE historiske situasjonen for EU, for Europa og for verda er det viktig at EU-kommisjonen er «vaksen nok» til å gjera konstruktive tiltak for framtidig politisk, kulturell og økonomisk sameksistens med Storbritannia.

DETTE ER noko som vil gagne folk flest, og det vil gi oss trua på framtida, stimulere oss til draumar om å få brukt ibuande evner og anlegg både for oss sjølve og det samfunnet me er ein del av.